HALOS 400 atleta ang lalaban para sa watawat ng Pilipinas sa pagbubukas ng 2023 Asian Games ngayong Setyembre.
Ayon kay Philippine Olympic Committee (POC) president Abraham “Bambol” Tolentino, 395 atleta ang ipapadala sa 19th edition ng regional games sa Hangzhou, China.
“Ang bilang ay umabot sa 400 ngunit kalaunan ay nabawasan pagkatapos ng serye ng mga deliberasyon ng POC at ng mga pambansang asosasyon sa palakasan,”ani sabi ni Tolentino pagkatapos ng POC general assembly sa East Ocean Seafood Restaurant noong Hulyo 21.
Idinagdag pa ni Tolentino na sasabak ang mga atleta sa 37 sa 40 sports mula Setyembre 24 hanggang Oktubre 8.
Layunin ng Pilipinas na mapantayan o malampasan ang apat na gintong medalya na napanalunan nina Hidilyn Diaz (weightlifting), Margielyn Didal (skateboarding), Yuka Saso (golf) at ang women’s team na sina Saso, Bianca Pagdanganan, at Lois Kaye Go (golf) sa huling Asian Games sa Jakarta at Palembang limang taon na ang nakararaan.
Nasungkit din ng bansa ang dalawang silver at 15 bronze na medalya.
Sinabi ni Tolentino na si Kayla Sanchez, na dating sumabak para sa Canada, ay pinapaboran na makakuha ng medalya sa limang event sa swimming.
Samantala, ang presidente ng Philippine Skating Union na si Nikki Cheng ay hinirang bilang deputy chef de mission sa Asian Games, kasama sina chef de mission Richard Gomez at deputy Karen Caballero.
Tinanggap din ang International Jet Sports Boating Association bilang 55th regular voting member ng POC at ang Cheerleading Association of the Philippines bilang ikasiyam na associate member.
