Sa pagsisikap na mapalakas ang disaster preparedness ng Pilipinas, nagkaloob ang United States government sa pamamagitan ng U.S. Agency for International Development (USAID), ng mga emergency relief supplies sa Fort Magsaysay sa Nueva Ecija, na kabilang sa mga Enhanced Defense Cooperation Agreement (EDCA) site kamakailan.
Mismong si U.S. Ambassador MaryKay Carlson ang nagbigay kay Secretary of National Defense Gilberto Teodoro, Jr. at Office of Civil Defense (OCD) Administrator Undersecretary Ariel Nepomuceno, ng mga emergency relief supplies para sa Pilipinas.
Kabilang sa mga ipinagkaloob ang emergency shelter-grade tarpaulins; shelter repair tools gaya ng hand saws, shovels, ropes, hammer, at nails; maging mga kitchen sets, kabilang ang mga pots, pans, bowls, plates at maging mga utensils.
Nabatid pa na kayang tustusan ng mga nabangit na kagamitan ang pangangailangan ng nasa 10,000 katao.
Ayon sa ibinahaging ulat ng US Embassy in Manila, pansamantalang iiimbak ang nasabing mga kagamitan sa OCD warehouse sa Fort Magsaysay para matiyak ang kakayahan ng gobyerno na makapagsagawa ng rapid delivery ng mga life-saving assistance.
“Today’s donation demonstrates how EDCA sites like Fort Magsaysay strengthen the Philippines’ humanitarian assistance and disaster preparedness efforts,” paliwanag ni Ambassador Carlson.
“The U.S. government remains committed to supporting the Philippines as it builds its national and local capacity to prepare for and respond to disasters,” aniya.
“The Philippines and the United States have a strong alliance. This alliance is demonstrated not just through words but through concrete actions of cooperation,” pahayag naman ni National Defense Secretary Teodoro.
Tinutulungan din ng United States ang Pilipinas sa kanilang disaster response efforts sa pamamagitan ng pagpapalakas sa kanilang mga community-based disaster risk reduction, sa pagkakaloob ng disaster response training at pagpapaigting sa ugnayang sibil ng Pilipinas at Amerika maging ng military ay humanitarian agencies.
Nabatid na mula 2010, ang U.S. government, sa pamamagitan ng USAID, ay nakapagbigay na ng nasa P19.6 billion ($344 million) para sa disaster relief and recovery aid at pagpapalakas sa disaster risk reduction capacity sa buong bansa.
