BINIGYAN na ng exemption sa ‘gun ban’ ng Commission on Elections (Comelec) ang mga matataas na opisyal ng pamahalaan maging ang kanilang mga ‘security details’ upang matiyak na hindi sila mapapahamak ngayong ‘campaign period’ at sa darating na aktuwal na halalan.
Inamiyendahan ng Comelec en banc ang Resolution No. 10728 para sa rekalibrasyon ng election gun ban at upang mapabilis ang proseso ng pagbibigay ng eksempsyon sa mga karapat-dapat na opisyal ng pamahalaan.
“These officials need to feel secured in performing their duties, free from fear and pressure from others,” ayon kay Comelec Chairman Saidamen Pangarungan.
Kabilang sa mga binigyan ng eksempsyon sa gun ban ay: ang Bise Presidente; Senate President at mga senador; Speaker, mga miyembro ng Kongreso; Chief Justice, mga mahistrado ng Korte Suprema; mga huwes ng Court of Appeals, Sandiganbayan, at Court of Tax Appeals; mga huwes ng Regional Trial Courts, municipal/metropolitan at circuit trial courts; mga cabinet secretaries, undersecretaries, assistant secretaries.
Kasama rin ang: Ombudsman, deputy Ombudsmen, mga imbestigador at prosecutor ng Ombudsman; Prosecutor General, Chief State Prosecutor, State Prosecutors at Prosecutores ng Department of Justice; mga opisyal at ahente ng National Bureau of Investigation; at mga elections officers, provincial election supervisors, at regional elections directors.
Sinabi ni Pangarungan na ayaw niya na may senior government official na masaktan o masawi sa pag-atake sa kanila dahil sa hindi nila maipagtanggol ang mga sarili gamit ang sarili nilang mga baril dahil sa gun ban. (Anthony Quindoy)
