BUMUO ang Department of Justice (DOJ) ng prosecution panel para magsagawa ng preliminary investigation kaugnay sa kasong murder at perjury na isinampa laban sa Cordillera police kaugnay sa checkpoint shooting sa Abra na nagresulta ng pagkamatay ng isang katao,may dalawang buwan na ang nakakalipas.
Ayon kay Prosecutor General Benedicto Malcontento ,ito ay para resolbahin ang reklamo na isinampa sa National Bureau of Investigation (NBI) ni Pilar town Vice Mayor Jaja Josefina Disono at kaanak ng nasawing supporter na si Sandee Boy Bermudo.
“The respondents will be given the opportunity to respond to the charges once they have been furnished with copies of the complaint. Thereafter, the case will be resolved considering the submissions of the parties,” ayon kay Malcontento .
Nabatid na isinampa ang reklamo ng NBI sa DOJ laban kina Police Regional Office-Cordillera Director Brig. Gen Ronald Lee, Abra police Acting Provincial Director Col. Maly Castillo Cula, Acting Pilar Municipal Police Station chief Capt Ronald Eslabra at iba pa.
Ang insidente ay nangyari noong Marso 29 alas- 10:30 ng umaga sa Philippine National Police (PNP) – Commission on Elections checkpoint sa may Berona Street sa Pilar kung saan napatay si Bermudo.
Unang sinabi ng pulisya na nagkaroon ng habulan at barilan sa pagitan ng van na sumusunod sa convoy ng Vice Mayor at mga pulis.
Hiniling naman ni Pilar Mayor Mark Ronald Somera, Disono at kapatid ng biktima na magsagawa ng imbestigasyon ang NBI dahil wala namang checkpoint sa lugar nang maganap ang insidente. (Jantzen Tan)
