Sanib-puwersa ang Philippine Red Cross (PRC) at Regional Emergency Assistance Communications Team (REACT) Philippines, Inc. sa pagpapaigting ng emergency responses at communication capacity ng isa’t isa.
Nabatid na lumagda ng Memorandum of Agreement (MOA) kahapon ang PRC at REACT upang gawing solido ang kanilang kolaborasyon sa humanitarian responses at paigtingin pa ang kanilang communication capacity sa panahon ng emergencies at krisis.
Si PRC Secretary-General Dr. Gwen Pang ang lumagda ng MOA kasama si REACT National President, Mr. Henry Bicoy, at REACT Regional Chief, Dr. Antonio Agustin, sa National Headquarters ng PRC sa Mandaluyong City.
Sa ilalim ng MOA, tinitiyak na maaaring tawagin at i-mobilize ng PRC ang mga first aiders, medical personnel, engineers, search and rescue teams, at radio operators, ng REACT, sa panahon ng emergency at disaster operations.
Nangako rin ang REACT na gagamitin ang kanilang communication resources upang tulungan ang PRC na palakasin pa ang kanilang communication capacity at suportahan ang service delivery programs at humanitarian campaigns ng PRC, gaya ng blood donation drives at RC143 volunteering program.
Nagpaabot naman ng pasasalamat si PRC Chairman at CEO, Richard “Dick” Gordon sa REACT.
Aniya, “We are looking for organizations, agencies, and individuals that can work with us in alleviating the sufferings of the most vulnerable Filipinos and REACT is definitely one of them. We stand ready to provide training to your first responders.”
Sa kanyang talumpati, tinukoy naman ni Pang ang kahalagahan ng partnership at mahalagang papel nito sa pagsuporta sa operasyon ng PRC.
“In situations where internet and communication networks are unreliable, we use radios to communicate. This partnership with REACT is vital in the communication aspect of our humanitarian operations, especially those in geographically-isolated areas where there is limited network coverage,” pahayag pa ni Pang.
