DAPAT suriin ng Department of Tourism (DOT) ang inilunsad na ”Love the Philippines” campaign kasunod ng mga batikos sa stock videos na kinunan sa ibang bansa.
Ito ang iginiit ni Senate Minority Leader Aquilino “Koko” Pimentel III kung saan sinabi ng senador na hindi rin niya maituturing na ”brilliant” ang slogan.
“Ngayon, ‘yung ‘Love the Philippines’ for me hindi rin siya ganoon ka-imaginative or creative or brilliant. Ang contribution doon is one word, ‘love’. ‘Yun lang ‘yun. Kasi ‘the Philippines’, ulitin ko, ‘yan ang pangalan na ‘yan. ‘The
Philippines’, tayo ‘yan. ‘Di na inimbento ‘yan, ‘di na kailangan isipin ‘yan. ‘Love’ lang ‘yung naisip,” pahayag ni Pimentel sa episode ng “The Mangahas Interviews”
“Siguro panahon na to revisit it and i-review ng Department of Tourism, ano ba ‘yung epekto ng ‘It’s More Fun in the Philippines’? Ano ba ‘yung mga data and statistics doon? Kung may empirical data, real life data or information na okay, kinagat
ng rest of the world ‘yon, nag-click ‘yan as a marketing slogan or marketing program, ituloy na lang natin kaysa sa ganito,” punto pa niya kay veteran journalist Malou Mangahas.
Pinuna rin ng senador ang katamaran umano sa paghahanda ng promotional video na inilabas kasunod ng paglulunsad ng bagong tourism slogan noong Hunyo 27.
”Yung unang hakbang ng pag-implement nila ng new marketing slogan and strategy, nadapa agad e. Ano bang nangyari doon? Bakit kasi ganu’n? Kahit ‘draft’ video lang ‘yun, gumamit na lang sila ng real Philippine scenery,” diin ni Pimentel.
“Mistake ‘yun, may pagkakamali ‘yung nag-draft ng video na ‘yun. Kulang sa sipag, kulang sa honesty,” giit pa niya.
Kaugnay nito, inirekomenda ni Pimentel na pagsamahin ang mga naunang slogan na ”It’s More Fun in the Philippines” at “‘Wow Philippines” sa kasalukuyang slogan para gawin itong “It’s more fun to love the Philippines, e di wow”.
Matatandaang sinabi ni Senadora Nancy Binay, chairman ng Senate committee on tourism na hindi na na dapat ipilit ng ahensya ang “Love the Philippines” slogan at bumalik na lamang sa dating slogan na
‘It’s More Fun in the Philippines’. (MARK ALFONSO)
