MULA sa pagiging kulelat, ang Pilipinas ay nasa ika-33 puwesto na mula sa may 121 bansa, pagdating sa COVID-19 recovery.
Base sa Nikkei COVID-19 Recovery Index, ang bansa ay kakikitaan ng patuloy na pagbaba ng mga naitatalang mga bagong kaso ng sakit, na may ‘low to no confirmed fatalities’ sa nakalipas na mga linggo, sa kabila ng pagbubukas ng mga borders nito sa international tourists simula noong Pebrero.
Nabatid na ang ideya ng Nikkei COVID-19 Recovery Index ng “recovered” state ay yaong mayroong mababang COVID-19 transmission, mababang death rates, mataas na vaccine coverage, at kakaunting prohibisyon o restriksiyon sa galaw ng mga mamamayan.
“#Vietnam and the #Philippines logged their best performances in Nikkei’s #COVID19 Recovery Index for May, as both countries managed to ease restrictions while keeping infections low.
Take a look at the full ranking here: https://t.co/XUXtCNIoZb pic.twitter.com/FvAlqCztWA,” ayon pa sa Nikkei Asia (@NikkeiAsia).
Kabilang naman sa mga bansang nangunguna sa index ay ang Qatar, Cambodia, United Arab Emirates, Rwanda, Kuwait, Luxembourg, Malta, South Korea, Dominican Republic, at Nepal.
Kaugnay nito, labis namang ikinatuwa ni Health Secretary Francisco Duque III ang naturang ulat.
“This remarkable recovery reported by independent external observers is being balanced by safety protocols managed by the Department of Health (DOH) and our partners,” ani Duque sa isang pahayag nitong Linggo.
“The DOH has always been aware that the COVID-19 pandemic response is more marathon than sprint. We are carefully pacing ourselves using the whole-of-government and whole-of-nation approach, led by President Rodrigo Roa Duterte. As the current administration ends, we are confident that the next administration and its incoming Secretary of Health will continue or even improve our march to recovery in the New Normal,” aniya pa.
Tinukoy pa ng DOH ang masigasig na pagtalima rin ng publiko sa mga ipinaiiral nilang minimum public health standards (MPHS) upang maisawan ang pagkalat ng COVID-19 gaya nang pagsusuot ng face masks, isolation, vaccination, madalas na paghuhugas ng kamay, pag-aalkohol at iba pa.
Binanggit rin ng DOH ang kakayahan ng whole genome sequencing na isinasagawa ng Research Institute for Tropical Medicine (RITM) at ng Philippine Genome Center (PGH) sa pagtukoy ng mga sub-variants ng COVID-19.
Noong nakaraang taon, nabatid na panghuli ang Pilipinas sa listahan ng mga bansang sinukat alinsunod sa kanilang kakayahang makarekober mula sa COVID-19 pandemic. (Anthony Quindoy)
