Bahagi ito ng huling pahayag na inilabas ng China Foreign Ministry na nagsasabing handheld-laser lamang ang kanilang ginamit para ma-determine ang bilis ng paglalayag ng Philippine Coast Guard at tulungan silang baybayin ang tamang direksyon.
Sa isang pahayag ay sinabi ni Wang Wenbin, tagapagsalita ng China Ministry of Foreign Affairs:” We provided the facts and China’s principled position on that. For the purpose of clarity, let me provide some more details.”
“The China Coast Guard ship was compelled to respond in accordance with law and warned the vessel to leave the area. During that process, the China Coast Guard ship used a hand-held laser speed detector and hand-held greenlight pointer to measure the distance and speed of the Philippine vessel and signal directions to ensure navigation safety,” aniya.
“We need to highlight the fact that the China Coast Guard ship did not direct lasers at the Philippine crew, and the hand-held equipment does not inflict damage on anything or anyone on the vessel. ‘The Philippine side’s allegation does not reflect the truth, “ dagdag pa nito.
Kasunod nito ay binatikos ng China ang Amerika sa pag-ungkat ng Mutual Defense Treaty nito sa Pilipinas para takutin ang Beijing, kasabay ng pagdepensa nito sa agresibong mga aksiyon ng kanilang coast guard patrols laban sa Philippine vessels sa West Philippine Sea.
Magugunita na unang nagpahayag ang Estados Unidos ng suporta sa Pilipinas sa pamamagitan ng paggiit ng kanilang Mutual Defense Treaty sa Pilipinas, kasunod ng insidente ng panunutok ng laser device ng Chinese Coast Guard sa Philippine Coast Guard sa may Ayungin shoal.
Subalit inihayag ng Chinese Ministry of Foreign Affairs spokesman Wang Wenbin na hindi aniya sila matitinag sa pagsiguro sa lehitimo at lawful rights at interests ng China.
Sa kabila ng naturang insidente, inilarawan ng Beijing ang kabuuang sitwasyon sa Ayungin shoal na kalmado at inihayag na ang naging aksyon ng Chinese Coast Guard ay “professional at restrained”.
Tinawag din ng Chinese official ang West Philippine Sea arbitration case na inisyatibo ng Pilipinas laban sa China bilang isang political drama na kagagawan ng US.
Nanindigan naman ang US na anumang armadong pag-atake sa Philippine armed forces, public vessels o aircraft kabilang ng Coast Guard sa may West Philippine Sea ay mag udyok sa US para tupdin ang mutual defense commitments nito sa ilalim ng Mutual Defense Treaty sa Pilipinas.
Kasunod nito ay ipinatawag ni Pangulong Ferdinand Bongbong Marcos Jr., si Chinese Ambassador Huang Xilian sa Malacañang para pagpaliwanagin sa insidente.
Sinundan ito ng pakikipagkita ni Huang Xilian kay Armed Forces of the Philippine chief of staff General Andres Centino kamakalawa sa AFP Headquarters sa Camp Aguinaldo, Quezon City.
“We discussed matters pertaining to military to military exchange and cooperation as well as sustaining peace and stability in the region,” ani Huang. (VICTOR BALDEMOR RUIZ)
