Nakatakda na ang lahat para sa pagdaraos ng Philippine Women’s 3×3 International Invitational sa Peb. 4-5 sa Robinsons Magnolia sa Quezon City.
Labindalawang koponan mula sa limang bansa ang maglalaban-laban para sa US$3,000 na cash top prize sa torneo na tinawag na “Manila Hustle 3×3” at iniharap ng Uratex at SMART.
Ang second at third runners-up ay makakatanggap ng US$2,000 at US$1,000, ayon sa pagkakasunod.
Si Janine Pontejos, miyembro ng 2019 SEA Games champion team, ang mangunguna sa Lady Macbeth Riots, isa sa anim na local squads na sasali sa event.
Ang iba pang koponan ay ang Uratex Dream Philippines, Uratex Tibay Philippines, Discovery Perlas, Angelis Resort at Army Altama.
Lalahpk din ang Owls.Exe Kujukuri at Zoos Tokyo (Japan), 1Eyehansol at G2L2 (Korea), Jumpshot (Singapore) at Shoot It Dragon (Thailand).
Ayon sa managing director ng Uratex na si Peachy Medina, ang layunin ng torneo “to deliver a highly-quality event featuring elite women basketball. In the process, we hope to hype up the growing sport of women’s 3×3 basketball in the world, uplifting all its passionate players, coaches, and fans, while delivering a great fan and player experience.”
Magsasagawa rin ng slam dunk at shootout contests para sa mas ikagaganda ng torneo kung saan magsisilbing hurado ang volleyball icon na si Alyssa Valdez at basketball star JayJay Helterbrand.
Ang pormal na paglulunsad ng event na idinaos sa Summit Hotel sa Greenhills, San Juan City noong Huwebes ay dinaluhan nina Medina, SMART First Vice President at Head of Sports Jude Turcuato at Samahang Basketball ng Pilipinas secretary general Sonny Barrios.
