HINDI direktang kinumpirma o itinanggi ng pamunuan ng Armed Forces of the Philippines na kusang sumuko si Kingdom of Jesus Christ (KOJC) leader Pastor Apollo Quiboloy sa Intelligence Service of the Armed Forces of the Philippine (ISAFP)
Ayon kay AFP spokesperson Col. Francel Margareth Padilla: “The Armed Forces of the Philippines (AFP) has been in full support of the Philippine National Police (PNP) from the onset of the operation related to the case of Quiboloy. Our role in this matter has been purely in support of the PNP’s efforts in serving the warrant. As this is primarily a police operation, we defer to the PNP to provide the details and updates on the situation. The AFP remains committed to assisting our law enforcement agencies in maintaining peace and order whenever necessary.”
Kasunod ng pagkalat ng balitang nadakip na si Quiboloy ay lumutang din sa social media na inihayag umano ni Eastern Mindanao Commander Lt. General Luis Bergante na sumuko si Pastor Apollo Quiboloy sa Intelligence Service of the Armed Forces of the Philippines (ISAFP) sa loob ng KOJC compound, subalit itinanggi ng tagapagsalita ng EASTMINCOM na si LtGen. Bergante ang nagsabi nito.
Sa isang panayam kay SILG Benhur Abalos ay sinabi nitong kahit kanino sumuko si Quiboloy mga pulis pa rin ang nagtrabaho, at dapat na bigyang pagkilala.
Inihayag din ni PNP Police Region Office 11 Director P/Bgen Nicolas Torre III sa ginanap na pulong-balitaan sa Camp Crame sa Quezon City na ‘formality’ na lamang ang sinasabing pagsuko dahil napapalibutan na siya at hindi naman siya sumuko sa ibang lugar kung hindi sa loob din ng KOJC Compound.
Kinumpirma din ni Torre na nagbaba sila ng ultimatum para lumabas si Quiboloy at kung hindi ay isasagawa na ang pagsalakay sa pinagtataguang gusali ng puganteng leader ng KOJC.
Samantala, inihayag ng Malacañang na wala pang plano na ma-extradite sa United States ang nahuling pastor. Sinasabing kailangan munang harapin ni Quiboloy ang mga kaso nito sa Pilipinas bago ipadala sa Estados Unidos.
Sa ambush interview kay Pangulong Ferdinand Marco, Jr., matapos mahuli ang puganteng pastor ay inihayag nito na wala pang extradition request mula sa Amerika para sa kustodiya ni Quiboloy.
Si Quiboloy ay nadakip matapos ang 16 araw na law enforcement operation ng PNP at militar sa KOJC compound, limang buwan matapos na magbanta ang puganteng sect leader na hindi ito magpapahuli nang buhay .
Kasalukuyan ding may kinakaharap na kaso sa Amerika ang KOJC leader dahil sa kasong human trafficking at child abuse.
Dahil dito, si Quiboloy ay nasa ‘wanted list’ din ng Federal Bureau of Investigation (FBI).
Ayon sa Pangulong Marcos, Jr., pahaharapin muna si Quiboloy sa mga reklamong inihain sa kanya sa mga korte dito sa bansa.
Samantala inihayag naman ng legal counsel ni Quiboloy na nagdesisyon itong sumuko sa mga pulis at militar upang matigil na ang “lawless violence” sa KOJC compound.
“…Pastor Apollo C. Quiboloy decided to surrender to the PNP/AFP because he does not want the lawless violence to continue to happen in the KOJC Compound,” pahayag ni KOJC legal counsel Atty. Israelito Torreon.
Inihayag din ng abogado na sumuko si Quiboloy sa mga awtoridad sa pamamagitan ng government officials at military at police personnel “whose character, integrity and honesty convinced Pastor Apollo Quiboloy to submit himself to the folds of the law, ” sa pangunguna nina Davao del Norte Governor Edwin Jubahib, Army Major General Allan Hambala, Colonel Guilbert Roy Ruiz , Lieutenant Colonel Jovily Carmel Cabading, Lieutenant Colonel Pete Malaluan, Lieutenant Colonel Ricardo “Ray” Garcia; Police Brigadier General Romeo Macapaz at Police Major General Benjamin Silo, Jr.
Sa kasalukuyan ay wala pang komento ang Philippine National Police (PNP) ukol sa pahayag ni Torreon.
Sinabi ng PNP nitong Linggo na sumuko si Quiboloy kasama sina Jackielyn Roy, Ingrid Canada, Cresente Canada at Sylvia Cemañes matapos bigyan ng ultimatum na sumuko sa loob ng 24 oras.#
