Pinuri ni Father Dan Cancino, MI ang hakbang ng Commission on Higher Education (CHED) na bawiin na ang 11-taong moratoryum sa mga bagong nursing courses.
Ayon kay Fr. Cancino, executive secretary ng Catholic Bishops’ Conference of the Philippines – Episcopal Commission on Health Care na makakatulong ang hakbang upang makapagsanay at makalikha ng mas maraming health care workers ang bansa.
Paliwanag ng pari na sa kasalukuyang kalagayan ng sektor ng kalusugan, mahalagang suportahan ng pamahalaan ang mga nagnanais na kumuha ng kursong nursing o medical courses lalo na sa mga kabataan.
Ito’y sa kadahilanang maraming mga kabataan nitong pandemya ang nagkaroon ng “mission-oriented mind” o kagustuhang makapaglingkod lalo na sa mga higit na nangangailangan.
“Ito ‘yung nakita namin noong nagkaroon ng pandemya na ang mga kabataan ay gustong tumulong, gustong mangalaga nang may sakit at nandoon ‘yung service-oriented. Sana huwag nating isantabi ‘yung espiritu na ‘yun lalong lalo na sa mga kabataan na gustong maghandog ng sarili,” ayon kay Fr. Cancino sa panayam ng Radio Veritas.
Simula ngayong araw, pahihintulutan na ng CHED ang mga Higher Education Institution (HEI) na magpadala ng kanilang petisyon para sa pagbubukas ng bagong nursing programs, ngunit binanggit na magiging mahigpit ito upang matiyak na hindi na muling maulit ang mga naranasang suliranin bago noon ipatupad ang moratoryo.
Taong 2011 nang ipatupad ang moratorium para sa bagong nursing courses dahil sa labis na bilang ng mga nursing graduates at pagbaba ng performance ng nursing education graduate sa Nurse Licensure Examination.
Kabilang pa rito ang pagdami ng mga HEI na nag-aalok ng BS Nursing Program na ang ilan ay halos hindi umabot sa karaniwang passing rate.
Mayroon ding ilang mga mag-aaral noon ang nagbabayad ng mga ospital para lamang magsanay dahil sa kakulangan ng mga paaralang may kaugnayan sa mga ospital.
Batay sa State of the World’s Nursing 2020 Report ng World Health Organization, ang Pilipinas ay mayroong higit sa 500,000 nursing personnel na bumubuo sa 71 porsyento ng health workforce ng bansa.
Inaasahan namang aabot sa 250,000 ang magiging kakulangan sa bilang ng mga nurse sa Pilipinas sa taong 2030, maliban na lamang kung may gawing hakbang upang mapanatili ang mga ito sa sektor ng kalusugan ng bansa. (Jaymel Manuel)
