NASABAT ng mga tauhan ng PNP Maritime Group at Bureau of Customs-Port of Zamboanga (BOC-POZ) Water Patrol Division (WPD) ang nasa P25 million halaga ng smuggled cigarettes sa may dalampasigan ng Sta. Cruz Island sa Zamboanga City.
Ayon sa ulat na isinumite kay BOC Commissioner Yogi Filemon Ruiz kahapon, nagsagawa ng maritime patrol operation ang mga element ng WPD at ng Enforcement and Security Service- Customs Police Division (ESS-CPD) sa bisinidad ng Sta. Cruz Island.
Dito nila nasabat ang 707 master cases ng puslit na sigarilyo na nagkakahalaga ng ?25 million sakay sa isang wooden motorized vessel M/L Paris.
Bigo ang 11 tripulante nito na makapagpakita ng kinakailangan importation documents para sa mga kontrabandong sakay nila .
Napag-alaman na nagmula ang motorized boat sa Pangutaran, Jolo sa Sulu, at sinasabing patungo sana sa Brgy. Baliwasan seaside sa Zamboanga City.
Ayon kay District Collector Segundo Sigmund Freud Barte, Jr., dahil sa direktiba ni Commissioner Yogi Filemon Ruiz na palakasin ang BOC water assets ay lumaki ang bilang ng mga successful apprehensions ng POZ sa pamamagitan ng maritime patrol.
Ang intensified border control ay kaugnay din sa kautusan ni President Ferdinand Marcos, Jr. na masawata ang smuggling activities sa kanilang mga jurisdiction.
Kasalukuyang sumasailalim sa pagsisiyasat at profiling ang mga inarestong crew ng M/L Paris.
Ang mga nasabat na kontrabando ay inilgay muna sa kustodiya ng BOC para sa inventory at ‘proper disposition in violation of Section 1113 (a) of Republic Act 10863, otherwise known as the “Customs Modernization and Tariff Act (CMTA) of 2016, in relation to Section 117 and the Tobacco Exportation and Importation Rules and Regulations.’ (VICTOR BALDEMOR RUIZ)
