ITINATAYANG aabot sa P10.5 million ng hinihinalang smuggled fuel ang nasabat ng mga intelligence operatives ng Bureau of Customs (BOC) sa loob ng isang compound sa Bataan.
Kamakalawa ay magkatuwang na sinalakay ng mga tauhan ng Customs Intelligence and Investigation Service-Manila International Container Port (CIIS-MICP), Enforcement and Security Service (ESS) at ng National Bureau of Investigation-Anti-Organized and Transnational Crime Division (NBI-AOTCD) ang compound ng gasoline sa Roman Super Highway, Barangay Mabatang, sa bayan ng Abucay.
Sa ibinahaging ulat ni BOC-CIIS director Verne Enciso, nadiskubre nila at ininspeksiyon ng kanilang mga operatiba ang 2,587 litro ng diesel fuel, 3,134 litro ng unleaded gasoline at 5,342 litro ng premium gasoline.
“Our agents also entered the compound where they found 3,100 liters of the unmarked fuels stored in four IBC (intermediate bulk container) tanks. These were later on confirmed by the failed fuel mark test conducted by SGS Mobile Laboratory-Limay and the ESS Fuel Marking Team,” pahayag ni Enciso.
Sinasabing isasalang muli sa confirmatory testing sa SGS Subic ang mga sample fuel na nag-negatibo sa fuel marking .
Matapos ang operasyon ay pinadlock at sinelyuhan ng raiding team ang mga fuel na isinailalim sa inspeksiyon
Ayon kay Enciso, oras na makumpirmang walang proper documents at necessary permits, ang mga may-ari ng gasoline station at ng sinalakay na compound ay maaaring kasuhan ng paglabag sa Sections 1401 at 1430 ng Customs Modernization and Tariff Act (CMTA), Sections 148-A, 254, at 265-A ng National Internal Revenue Code (NIRC), as amended by the the Tax Reform for Acceleration and Inclusion Act. Ang mga may ari ay una nang hinanapan ng proof of payment ng duties and taxes.
