ISANG bagong police outpost ang itinayo sa gitna ng Claro M. Recto Avenue at Juan Luna Street, Tondo, Manila bilang paghahanda sa inaasahang pagdagsa ng mga mamimili sa Divisoria ngayong ‘ber’ months.
Target nitong matiyak ang kaligtasan ng mga mamimili at maging ng mga vendor sa Divisoria na dinarayo dahil sa mga murang bilihin dito.
Itinayo ang outpost sa inisyatibo ni Police Lieutenant Colonel Harry Ruiz Lorenzo lll na ang magsisilbing hepe ng Delpan Mobile Post ay si Police Senior Master Sergeant Gerardo Tubera.
Pinasinayaan ang outpost sa pangunguna ni MPD- Director Brigadier General Andre Perez Dizon kasama sina Police Colonel Raul Tacaca, Deputy District Director for Administration; Police Colonel Arnold Thomas Ibay, Chief District Directorial Staff at Police Major Anthony Olgado, hepe ng Manila District Traffic Enforcement Unit.
Si Fr. Leo Casas ng Sto. Niño Church ang nagbasbas sa outpost na sinaksihan din ng ilang miyembro ng Manila Chinese Action Team (MCAT) sa pangunguna ni Edwin Fan at ni Retired Lieutenant Jimmy Soriano at asawa nito.
Hinugot ito sa programa ni Police Brigadier General Jonnel C. Estomo, NCRPO chief na SAFE o “Seen, Appreciated and Felt by the people through Extraordinary actions”. (VICTOR BALDEMOR)
