TAHASANG itinanggi ng Philippine National Police (PNP) na mayroong “undercounting” sa bilang ng mga napaslang sa kanilang anti-illegal drug operation simula nang umupo si Pangulong Ferdinand Bongbong Marcos, Jr.
Sa binigay na pahayag sa media ni PNP Spokesperson Police Col. Jean Fajardo, hindi nila alam kung saan binase ng Human Rights Watch (HWR) sa kanilang datos.
Base sa record ng PNP, wala umanong history ang pambansang pulis ng pagtatago ng bilang ng mga napatay dahil transparent sila sa pag-uulat nito.
Una ng iniulat ni PNP chief Police General Rodolfo Azurin, Jr na nasa 46 drug suspects ang napatay sa mahigit 18,500 police operations simula nang manungkulan ang Marcos administration, habang may 22,000 drug suspects ang naaresto.
Nitong nakalipas na linggo ay sinabi ni HRW Deputy Asia Director Phil Robertson na base sa report ng PNP, nasa 46 na tao lamang ang napatay sa mga anti-drug operations nang magsimula ang Marcos administration noong June 30, subalit base sa kanilang monitoring, umabot na sa 127 ang naitalang patay mula July 1 hanggang November 7 ngayong taon.
Ayon kay Robertson, dina-downplay ng PNP ang recent killings sa ‘war on drugs’ sa pamamagitan ng paggigiit na “very minimal” lang ang mga nasasawi.
Kaya kinalampag ng Human Rights Watch (HRW) ang PNP hinggil sa ‘undercounting’ o mas mababang naitatala kesa sa aktwal na bilang ng mga nasawi sa anti-illegal drug operations mula nang umupo sa pwesto si PBBM.
Sinabi din noon ng Pangulo na nais nitong mag-focus sa rehabilitasyon ng mga drug suspect, subalit sinabi ng grupo na walang ebidensya na nagpapakita na gumawa ng aksyon ang mga awtoridad para maisakatuparan ang naturang hakbangin.
Sinabi pa ng grupo, nais na palabasin ng PNP sa nangyaring mga pagpatay sa ‘war on drugs campaign’ ng gobyerno na “very minimal” lamang ang bilang ng drug war deaths sa bansa sa ilalim ng Marcos administration. (VICTOR BALDEMOR RUIZ)
