Iniulat ng Commission on Elections (Comelec) na nasa 61 mula sa 66 senatorial candidates ang nakapagsumite na ng kanilang Statements of Contributions and Expenditures (SOCEs) para sa katatapos na May 12, 2025 midterm polls, bago tuluyang nagtapos ang taning para dito noong Miyerkules ng hapon, Hunyo 11.
Sa datos na ibinahagi sa media ni Comelec Chairman George Erwin Garcia, nabatid na hanggang Hunyo 11, kabilang sa mga nakapaghain ng SOCE ay sina Erwin Tulfo, Victor Rodriguez, Norberto Gonzales, Willie Ong (Withdrawn), France Castro, Vicente Sotto III, Angelo de Ablan, Ronaldo Jerome Adonis, Phillip Salvador, Jesus Hinlo Jr., Raul Lambino, Bam Aquino, Arlene Brosas, Leandro Verceles, David D’Angelo, Jose Montemayor Jr., Maria Imelda Marcos, Subair Mustapha, Jose Sonny Matula, Francis Pangilinan, Panfilo Lacson, Norman Marquez, Rodante Marcoleta, Ariel Querubin, Richard Mata, at Jocelyn Andamo.
Nakapaghain rin ng SOCE sina Apollo Quiboloy, Pia Cayetano, Liza Maza, Eufemia Doringo, Arnel Escobal, Manuel Lapid, Allen Capuyan, Erik Martinez, Mario Valbuena, Jimmy Bondoc, Ronnel Arambulo, Christopher Lawrence Go, Danilo Ramos, Ernesto Arellano, Marc Gamboa, Heidi Mendoza, Nur-Ana Indanan Sahidulla, Benhur Abalos, Emmanuel Pacquiao, Bonifacio Bosita, Jose Jessie Olivar, Camille Villar, Bong Revilla, Roberto Ballon, Relly Jose Jr., Luke Espiritu, Willie Revillame, Bato Dela Rosa, Mar-Len Abigail Binay, Francis Tolentino, Ben Tulfo, Leodegardo de Guzman, Ronaldo Adonis, Amirah Lidasan, at Gregorio Honasan II.
Hindi naman nakapaghain ng SOCE sina Chavit Singson, Wilbert Lee, Teodoro Casiño, at Roy Cabonegro.
Sina Singson at Lee ay matatandaang una nang nag-withdraw ng kanilang kandidatura dahil sa magkaibang kadahilanan.
Samantala, nasa 25 naman ang political parties na nakapaghain na rin ng SOCE habang 144 naman ang mga party-list groups.
Una nang itinakda ng Comelec ang deadline para sa paghahain ng SOCE hanggang 5:00PM ng Hunyo 11.
Ayon sa Comelec, hindi na palalawigin pa ang naturang deadline.
