PUWEDE nang idagdag ang veteran volleyball player na si Michele Gumabao sa roster ng Creamline na Most Valuable Player winners.
Sa kanyang ikapitong season sa Premier Volleyball League (PVL), nakamit ni Gumabao ang MVP honor sa katatapos na 2024 Invitational Conference.
Tatlong beses naging PVL Best Opposite Spiker awardee, lumabas si Gumabao bilang nangungunang local scorer sa invitationals, matapos makaipon ng 59 puntos mula sa 52 attacks, apat na aces, at tatlong blocks. Ang kanyang kahusayan ay partikular na kapansin-pansin dahil nakamit niya ang 37.96 porsyento na rate, na pumapangalawa sa liga.
Bukod pa rito, pumuwesto siya bilang pang-apat sa service na may average na 0.29 aces bawat set.
Tinulungan ni Gumabao ang Cool Smashers na manalo sa Invitational championship, at nakumpleto ang inaasam-asam na grandslam — ang kauna-unahan sa nag-iisang professional volleyball league sa bansa.
Sa Invitational Conference, kung saan naglaban-laban ang mga lokal na koponan kasama ang mga import, walang award para sa Best Foreign Guest Player. Gayunpaman, ang mga dayuhang manlalaro ay karapat-dapat na mapangalanan sa Premier Team.
Kinilala bilang Best Outside Spikers sina MJ Perez ng Cignal at Erica Staunton ng Creamline.
Si Perez, ang Venezuelan reinforcement ng HD Spikers, ang nanguna sa liga sa pag-iskor na may 115 puntos o 35.02 porsiyentong kahusayan, at pumangalawa sa blocking na may 0.60 bawat set.
Sumunod si Staunton, ang American import ng Cool Smashers na may 61 puntos at 36.24 porsiyentong kahusayan, na pumangatlo sa liga.
Tinanghal na Best Middle Blockers sina Jackie Acuña ng Cignal at Low Mei Cing, na kilala rin bilang Maggie, mula sa Japanese guest team na Kurashiki. Parehong mahusay sa depensa ang dalawa, kung saan nagtala sina Acuña at Maggie ng tig-siyam na blocks, ang pinakamataas sa liga. Si Maggie, isang Malaysian-Taiwanese player, ay umiskor din ng 65 puntos, nagtapos sa ikatlong kabuuan, habang si Acuña, produkto ng National University, ay pumangatlo sa mga local middle blockers na may 23 puntos.
