Bukod sa pulitika, itinutulak ni Sen. Erwin Tulfo ang pag-alis na sa mga “unnecessary’ o di naman kailangan na requirements sa pagkuha ng ayuda mula sa gobyerno ng mga mamamayan.
Ito ay ipinahayag ni Sen. Erwin sa nakaraang pagdinig ng Senate Committee on Social Justice, Welfare and Rural Development na kanyang pinamumunuan, kung saan natalakay ang kanyang kanyang panukalang batas na gawing permanente o ‘institutionalized’ naang Assistance to Individuals in Crisis Situation (AICS) Program ng Department of Social Welfare and Development (DSWD).
“Ang gagawin natin ay lilimitahan ang mga requirement sa dalawa na lamang. Sisiguraduhin nating matatanggal ang mga hindi kailangang requirement gaya ng barangay indigency form at marriage contract. Halimbawa, kailangan mo ng medical assistance, valid ID at hospital bill lang ang kailangang ipakita,” ani Sen. Erwin.
Aniya, ang pagpapadali sa pagkuha ng ayuda ay magpapatigil sa mga politiko na makialam sa proseso ng distribution: “Sa totoo lang, dito pumapasok ang politika dahil kapag nangangailangan ng tulong ang isang Pilipino, wala silang choice kundi kumuha ng indigency form kung saan nakapaskil ang mukha at pangalan ng mga opisyal ng barangay. Requirement ito sa kasalukuyan; kung wala nito, wala silang makukuha na tulong.”
Binigyan-punto ng Senador na sa kasalukuyan, upang makakuha ng ayuda ay kailangang magsumite ang mga Pilipino ng valid ID, Certificate of Indigency mula sa barangay, Barangay Clearance, notarized affidavit, Social Case Study Report at sa ilang pagkakataon, marriage certificate.
Inihayag naman ng DSWD na kapag naging ganap na batas ang panukalang AICS, plano nilang iakyat ang programa bilang isang bureau pang mapabuti ang staffing pattern at implementasyon nito.
Hiniling ni Sen. Tulfo sa Department of Interior and Local Government (DILG) na pabilisin ang pagpapakalat ng impormasyon na naglilinaw na nagbabawal sa mga politiko na makialam sa pamamahagi ng ayuda.
Aniya, “Malinaw sa 2026 General Appropriations Act na hindi pinapayagan ang presensya ng sinumang politiko. Aksyunan ito agad dahil malapit na ang eleksyon, at nangangamba ang ating mga kababayan na baka gamitin na naman sa politika ang ayuda.”
Kaugnay niyan ay tumugon naman ang DILG sa panawagan ni Tulfo sa pamamagitan ng paglalabas ng Memorandum Circular No. 2026-066, na nagbabawal maglagay ng pangalan o larawan ng mga opisyal ng gobyerno sa anumang proyekto na pinopondohan ng gobyerno.
Matatandaan na mtagal nang isinusulong ni Sen. Erwin ang pinaigting na kampanyang “anti-epal” upang pigilan ang mga politiko sa pakikilahok at pag-angkin sa mga ayuda ng gobyerno bilang sarili nilang proyekto.
