NILINAW kahapon ng pamunuan ng Armed Forces of the Philippines (AFP) na hindi beripikado o ‘validated’ ang pinakakalat sa mga social media na ‘mass resignation’ sa hanay ng kasundaluhan bilang suporta sa inarestong dating Pangulong Rodrigo Roa Duterte.
Sinabi ni AFP spokesperson Col. Francel Margareth Padilla,: “We urge everyone to exercise critical discernment and avoid spreading unconfirmed information. Maging mapanuri at responsable sa pagkuha at pagpapalaganap ng impormasyon, lalo na sa mga isyung maaaring magdulot ng pagkakawatak-watak.”
Binigyang-diin ng taga pagsalita na ang Hukbong Sandatahan ay nananatiling propesyunal at tapat sa ‘chain of command’ ang buong organisasyon sa gitna ng mga kaganapan.
Ayon kay Lt Gen. Roy Galido, hepe ng Philippine Army, ang papek nila ngayon sa internal security ay suportahan ang Philippine National Police (PNP) at tuloy-tuloy din ang pakikipag-ugnayan nila ngayon sa Pambansang Pulisya.
Tiniyak din ni Galido na walang usap-usapan ng kudeta o pag-aaklas sa hanay nila, kaya’t hindi kailangan na magsagawa ng loyalty check sa buong organisasyon.
Ayon kay Galido, pag-aaksaya lang ito ng oras kung sakali at tiniyak pa ng heneral na mananatili sila bilang “professional, unified and non-partisan institution, committed to its constitutional mandate of defending the nation and serving the Filipino people.”
Dagdag pa ni Army spokesman Col Louie Dema-ala: “kung social media lang ‘yang basis natin, definitely, hindi natin mapapaniwalaan yan. But currently, wala tayong nare-receive na reports, actual na mga sundalo ng Phil. Army, na nagreresign.”
Inihayag naman ni Philippine Air Force spokesperson Col. Ma Consuelo Castillo na wala silang nasasagap na may namumuong ‘unrest’ o nagaganap na personnel resignations sa kanilang hanay.
“The PAF Command ensures that our personnel continue to embody professionalism and loyalty to our flag and people, while maintaining absolute political neutrality,” dagdag pa ni Col Castillo.
Pahayag naman ni Philippine Navy spokesman Capt John Percie Alcos, “We remain steadfast in our duty to ensure national security and stability. The Philippine Navy assures all Filipinos that we uphold the highest standard of professionalism. Every sailor and marine will remain loyal to the constitution and to the oath that we took to serve the country and the Filipino people.”
