PATAY ang isang kilabot na lider ng Bangsamoro Islamic Freeedom Fighter (BIFF) at 11 tauhan nito sa inilunsad na ‘decisive military operation’ ng Armed Forces of the Philippines, sa layuning simutin ang nalalabing kasapi ng mga teroristang grupo sa Maguindanao del Sur.
Bukod sa mga napaslang na terorista ay nabawi rin ng mga tauhan ng1st Brigade Combat Team ang 12 high-powered firearms, matapos nilang makasagupa ang may 15 kasapi ng Bangsamoro Islamic Freedom Fighters-Karialan Faction (BIFF-KF) na pinamumunuan ni alias Karialan, sa Sitio Pendililang, Barangay Kitango, Datu Saudi Ampatuan, Maguindanao del Sur kamakalawa.
Sa ulat na ipinarating kay Army Commanding General, LtGen Roy Galido, matapos ang serye ng habulan at sagupaan ay napatay sina Mohiden Animbang, a.k.a. Karialan, Leader ng grupo; Saga Animbang, Operations Officer ng grupo; at sampung miyembro nito na na kinabibilangan nina Ustads Monib Animbang, Ustads Kanary Macmod, Omesi Animbang, Amin Salik, Reduwan Animbang, Commander John Alon, alias Kahar, Tamer Animbang, Julaimi Animbang at Bilo Abudrasid.
Habang nagsasagawa ng clearing operation sa encounter site ay nadiskubre ang bangkay ng mga napaslang na terorista.
Nakuha rin sa pinagyarihan ng sagupaan ang mga war materials, kabilang dito ang limang M16A1 rifles, apat na M14 rifles, dalawang M653 rifles, isang M4 rifle, isang M67 fragmentary hand grenade at isang improvised hand grenade.
“We are sad to report that seven of our soldiers were wounded during the course of the fight,” pahayag ni Lt. Gen. William Gonzales, Commander ng Western Mindanao Command.
“They were all immediately evacuated to safety for immediate medical attention. As of this report, they are already being taken care of by the best physicians and medical practitioners,” dagdag pa ni Gonzales.
“We ask for prayers from all peace-loving people of the country for the successful recovery of our wounded soldiers. Despite the expertise of our doctors, your prayers will be the most powerful tool for them to stay alive and be well again,” pahayag pa nito.
Kasalukuyang ginagalugad pa ng mga sundalo ang lugar sa pagsisikap na ma neutralize pa ang mga nalalabing kasamahan ng grupo.
“We will not stop until we neutralize all the terrorists who refuse to end their useless battle peacefully. Our soldiers are out there hunting for them,” ani Lt. Gen. Gonzales, kasabay ng pagbibigay papuri sa Army 6th Infantry Division dahil sa kanilang magandang accomplishment.
