Pinagi-inhibit ng mga prosecutors ng Department of Justice (DOJ) si Muntinlupa RTC Br. 204 Judge Abraham Joseph Alcantara sa pagdinig sa ikatlo at huling drug case na kinakaharap ni dating Senador Leila de Lima.
Sa isang motion for voluntary inhibition, sinabi ng prosecutors na si Alcantara rin ang duminig sa ikalawang drug case ng dating senador at inabswelto ito dahil sa pag-urong sa testimonya ng mga testigo.
Nabatid na nai-raffle sa sala ni Alcantara ang ikatlong drug case ni De Lima matapos mag-inhibit si Judge Romeo Buenaventura.
Iginiit ng prosecution panel sa kanilang mosyon na nararapat magbitiw sa paghawak ng naturang kaso si Alcantara upang maalis ang anumang pagdududa sa magiging desisyon nito, lalo pa at nananatiling kwestiyonable diumano sa DOJ ang naging desisyon nito sa ikalawang drug case ni De Lima.
“We reiterated that when a judge exhibits actions that give rise, fairly or unfairly, to perceptions of bias, such faith and confidence are eroded, and he has no choice but to inhibit himself voluntarily. A judge may not be legally prohibited from sitting in a litigation, but when circumstances appear that will induce doubt on his honest actuation and probity in favor of either party, or incite such state of mind, he should conduct a careful self-examination. He should exercise his discretion in a way that the people’s faith in the courts of justice is not impaired. The better course for the judge is to disqualify himself,” paliwanag pa ng prosekusyon sa kanilang mosyon.
Kinakailangan umano na matiyak na magkakaroon ng patas na paggalaw ng hustisya at dahil diyan ay iginiit ng panel of prosecutors na muling mai-raffle ang kaso ni De Lima sa ibang judge. (JANTZEN ALVIN)
