SINABI ni Health Secretary Teodoro Herbosa na hindi na umano bago ang Human Metapneumovirus (hMPV) dahil Ito ay natuklasan noon pang 2001 ng mga mananaliksik na Dutch.
Ayon kay Herbosa, sa mga sample ng nasopharyngeal aspirate ay nakita mula sa mga bata na may mga impeksyon sa paghinga na dulot ng hindi kilalang mga pathogen. Sa Pilipinas, sinusuri ang hMPV bilang bahagi ng panel 2 (expanded panel) para sa mga specimen na negatibo ang pagsubok sa panel 1 (para sa Influenza, SARS-CoV-2, at RSV) bilang bahagi ng ating Influenza-Like Illness (ILI) at pagsubaybay sa Severe Acute Respiratory Illness (SARI).
“Hindi bagong virus ang hMPV. Matagal na natin siyang kayang tukuyin. Hindi rin malala ang kanyang sintomas. Tulad ng karaniwang ubo at sipon, gumagaling siya ng kusa basta malakas ang ating resistensya,” ayon kay Herbosa.
Ika-anim na umano ang hMPV sa mga natukoy na causative agent ng ILI sa Pilipinas para sa 2024.
Mula Enero 1 hanggang Disyembre 21, 2024, 284/4,921 (5.8%) ang mga positibong sample ay dahil sa hMPV. Kamakailan lamang, mula Disyembre 1 hanggang 21, 2024, 10/339 (2.9%) ang mga positibong sample ay dahil sa hMPV. Ang hMPV ay paminsan-minsang nakikita, na walang kakaibang clustering o pattern sa buong taon.
Napag-alaman na karamihan sa mga taong nahawaan ng hMPV ay magkakaroon lamang ng banayad na mga sintomas, na kinabibilangan ng ubo, lagnat, pagkabara ng ilong at halak.
Ang mga bihirang malubhang kaso ay maaaring magresulta sa bronchitis o pulmonya, lalo na sa mga sanggol, matatanda at mga indibidwal na immunocompromised. Ang mga may dati nang kondisyon sa baga, tulad ng Asthma, Chronic Obstructive Pulmonary Disease (COPD) o emphysema, ay nasa mas mataas na panganib na magkaroon ng malalang resulta.
Muling pinaalalahanan ng DOH ang publiko, lalo na ang mga kabataan, immunocompromised at matatanda, na mag-ingat sa pamamagitan ng madalas na paghuhugas ng kamay, pag-iwas sa matataong lugar kung maaari at pagkain at pag-inom ng tubig nang maayos. Hinihimok din ng DOH ang mga ‘high -risk’ o may mga komplikadong sintomas na humingi ng medikal na pangangalaga sa lalong madaling panahon.
