“Walang dokumento. Walang forensic findings. Walang sinumpaang salaysay. Walang kasong inihain sa alinmang awtoridad. Ang meron lamang ay isang panayam, na paulit-ulit na ikinalat sa social media.”
Ganito isinalarawan ni Chairman Emeritus Jose Antonio Goitia ang kumakalat ngayon online na aniya ay mga huwad at mapanirang paratang laban kina Pangulong Ferdinand R. Marcos, Jr. at Unang Ginang Liza Araneta-Marcos.
May binabanggit diumano na droga, sekswal na gawain at umano’y mga “sensitibong” larawan—kabilang ang mga inedit o pekeng materyal na malisyospng iniuugnay sa Unang Ginang.
“Walang ebidensya ang mga ito. Kailangang malinaw ito. Ang tunay na kritisismo ay nakabatay sa katotohanan. Ang nangyari rito ay mga paratang na walang ebidensya, na pinalaki sa pamamagitan ng tuloy-tuloy na pagpapakalat,” phna ni Goitia.
“Hindi ito lehitimong kritisismo. Isa itong paninirang-puri. Isang panayam na ginamit sa pagpapakalat ng kasinungalingan,” ano Goitia.
Pinatutungkulan ni Goitia and ipinakalat na mga paratang sa pamamagitan ng isang online na panayam na isinagawa ng vlogger na si Deen Chase. Sa panayam na ito, kapansin-pansin umano na walang seryosong pagtatanong, walang beripikasyon at walang pananagutan at dahil dito, ang mga pahayag na hindi nasuri ay mabilis na kumalat.
Ang paggamit umano ng pormat ng panayam ay hindi nagbibigay ng kredibilidad at sa halip, pinapadali lamang nito ang pagkalat ng paratang: “Walang awtentikasyon, walang pagsumite sa mga institusyong maaaring magsuri, at kaswal ang tono—na para bang sapat na ang pag-uulit para paniwalaan.”
“May sariling pamantayan ang katotohanan.
Huwag nating lokohin ang sarili natin. Ang panayam ay hindi pahintulot para maglabas ng paratang na walang patunay. Malinaw ang layunin: kumalat ito at hindi maliwanagan,” ano Goitia.
Ipinunto pa nito na hindi nagkataon ang pagtuon sa diumano’y sekswal na asal at sinasabing pribadong mga larawan ng Unang Ginang.
“Ito ay isang kilalang taktika. Kapag walang maipakitang katotohanan, dangal ang tinatarget. Kapag hindi kayang usigin ang pamamahala, personal na buhay ang binabalahura. Dahil babae ang ginagawang paksa, inaasahang mas tatagal ang pinsala kahit malinaw na walang batayan ang mga paratang,” pahayag ni Goitia.
Aniya pa, “Ito ay isang malinaw na gender attack,” ayon kay Goitia. “Umaasa ito sa hiya at pahapyaw na paratang dahil alam nilang mas mahirap itong ituwid, kahit mapatunayang mali.
Walang larawang napatunayan. Walang ekspertong nagkumpirma. Ngunit inaasahan ng mga nagpakalat na sapat na ang paratang mismo para makapanira.”
Habang bukas umano sa pagsusuri ang mga opisyal ng gobyerno, hindi saklaw ng malayang pananalita ang pag-iimbento ng krimen at imoral na gawain. Kapag umano ang mga ganitong paratang ay ipinakalat online nang walang sapat na batayan, maaari itong magbunga ng pananagutang kriminal at sibil sa ilalim ng umiiral na mga batas sa libel at cyber libel.
Binigyang-diin ni Goitia na hindi sapat ang ikubli ito sa salitang “opinyon,” o ipalusot bilang “panayam” at hindi rin nawawala ang pananagutan dahil lamang sa pag-share dahil sa mata ng batas, ang mahalaga ay ang pinsalang naidulot, hindi ang mga palusot na ginamit.
“Ang malayang pananalita ay may hangganan. Hindi ito lisensya para manira ng pangalan, at malinaw na nalampasan na ang linyang ito,” aniya pa.
Dapat umano ay malinaw ito sa mga patuloy na nagpapakalat ng ganitong paratang: may tunay na pinsala ang kanilang ginagawa, at may kaakibat itong pananagutan.
Ibinabala pa niya na kapag nagpapatuloy ang pag-uulit ng mga paratang sa kabila ng kawalan ng patunay, hindi na ito simpleng pagkakamali—nagiging malinaw na may intensyon, at sa ganitong mga usapin, mahalaga ang intensyon.
“Ang seryosong akusasyon ay nangangailangan ng seryosong ebidensya. Kung wala nito, ang nararapat na hakbang ay malinaw: tumigil. Maaaring mabilis kumalat ang impormasyon sa internet at madali rin itong makalimutan, ngunit hindi palaging ganoon ang nangyayari. Ang kasinungalingan ay maaaring mabilis umikot, ngunit ang pananagutan ay dumarating din—sa tamang panahon at sa tamang paraan,” saad ni Goitia.
Dagdag pa nito: “Ito ay hindi usapin ng pagpigil sa malayang pagpapahayag,” pagtatapos ni Goitia. “Ito ay usapin ng katotohanan, pananagutan, at ng mga pamantayang nagpapanatili ng tiwala sa ating lipunan.”
Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at ng Filipinos Do Not Yield Movement (FDNY). Siya ay may hawak na Juris Doctor at Doctor of Philosophy (PhD), gayundin ang mga advanced degree na MNSA, MPA at MBA, bukod sa iba pa.
