Natagpuang patay ang isang 19-anyos na estudyante matapos na magbigti umano kamakalawa ng gabi sa roof op ng kanilang bahay sa Tondo, Maynila.
Sinabi ni PSMS Niño Baladjay, imbestigador ng Manila Police District-homicide section, na ginamit ng biktimang si Napoleon Ferrer, ng 95-D Quirino St.Tondo ang sampayan ng damit sa kanyang pagbibigti.
Alas- 6:40 ng gabi nang dumating sa kanilang bahay ang kapatid ng biktima na si Lorrence Ferrer,24 at hinanap ang biktima sa loob ng bahay. Pag- akyat sa roof top ay doon na niya nakita na nakabigti ang biktima.
Ayon kay Laxmi Camarines,kaibigan ng pamilya, huli niyang nakitang buhay ang biktima alas- 6 ng gabi habang naglalaro ng ‘mobile legend’ sa kanyang kama.
Ani Lorrence, ang biktima ay mabilis na ma-depress kahit sa maliit na problema lamang.
Samantala ay tumanggi ang pamilya na paimbestigahan pa ang pagkamatay ng biktima sa paniniwala na walang foul play na naganap dito. (Philip Reyes)
