Kinumpirma ni Justice Secretary Jesus Crispin Remulla na darating sa bansa sa Pebrero 6 si United Nations (UN) special rapporteur on extrajudicial, summary, and arbitrary executions.
Gayunman,nilinaw ni Remulla na inimbitahan niya si Dr. Morris Tidball-Binz, isa rin forensic pathologist hanggang Pebrero 9 bilang bahagi ng “capacity building” sa ilalim ng United Nations Joint Programme (UNJP).
“I invited Dr. Tidball-Binz because his work speaks for itself. His missions and projects have had an immeasurable impact on the countries he has helped,” ayon kay Remulla.
“He has provided closure for families of victims of extrajudicial killings and enforced disappearances. We are hoping for the same when he visits the Philippines,” dagdag ni Remulla.
Nilinaw rin ni Remulla na hindi darating si Tinball-Binz bilang isang Special Rapporteur kundi bilang isang eksperto sa larangan ng forensic pathology.
“He is coming in his capacity as an expert in the field to help capacitate our current doctors,” paglilinaw ni Remulla.
Tiniyak ni Remulla na si Tidball-Binz ay makikipagkita sa kanya at kina Department of Foreign Affairs Secretary Enrique Manalo, Philippine Drug Enforcement Agency Director-General Moro Virgilio Lazo, Philippine National Police Chief Rodolfo Azurin, at National Bureau of Investigation Director Medardo De Lemos.
Napag-alaman na si Tidball-Binz ay co-founder ng Argentine Forensic Anthropology Team, na nakapag-develop ng scientific methods na maaring gamitin sa imbestigasyon ng human rights at humanitarian violations.
Sumali rin siya noong 2004 sa International Committee of the Red Cross (ICRC), ang tanging humanitarian organization na may forensic capacity na ekslusibong ginagamit sa “humanitarian purposes”.
Tumulong din siya sa pagbuo ng ICRC Forensic Unit at nagsilbing Director hanggang 2017 hanggang pamunuan ang forensic operation para Humanitarian Project Plan.
Noong Abril 1, 2021, si Tidball-Binz ay itinalaga bilang UN Special Rapporteur for extrajudicial, summary, or arbitrary executions. (Jaymel Manuel)
