Nirekomenda ng Department of Justice (DOJ) ang pagsasampa ng 62 counts ng kasong anti-money laundering laban kay dating Bamban, Tarlac Mayor Alice Guo at 30 iba pa.
Ayon kay DOJ Spokesperson at Assistant Secretary Mico Clavano, naging batayan ng panel of prosecutors sa kanilang resolusyon ang kanilang naging findings sa mga ilegal na aktibidad sa sinalakay na compound sa Bamban, Tarlac.
Ayon kay Clavano, kabilang sa rekomendasyon ng panel of prosecutors ang pagsasampa ng 26 bilang ng money laundering sa ilalim ng Section 4(a) ng Republic Act 9160 o ang Anti-Money Laundering Act of 2001 at limang counts ng money laundering sa ilalim naman ng Section 4(b) ng Republic Act 10365 o Anti-money Laundering Law in the Philippines.
Inirekomenda rin naman ng panel ang paghahain ng 31 bilang ng kasong paglabag sa Section 4(c) ng RA 10365 laban sa dating alkalde at 30 iba pa.
“We already gave the authority to the panel of prosecutors to file the corresponding information subject of the resolution. I don’t have an exact date pero we can expect as soon as possible ifa-file na ito sa court,” ani Clavano.
Samantala, ibinasura naman ng panel ang reklamo para sa money laundering sa ilalim ng Section 4(c) dahil sa kawalan ng prima facie evidence at reasonable certainty of conviction.
Kabilang sa ibinasurang reklamo ay ang money laundering sa ilalim ng Section 4(e) kontra kay Cassandra Li Ong, na siyang authorized representative ng Porac POGO hub, gayundin kina Atty. Jason Masuerte, at Nancy Gamo dahil sa kawalan ng prima facie evidence at reasonable certainty of conviction.
“Some of the cases were dismissed dahil hindi po siya umabot doon sa threshold na bago… so it speaks to the reforms of the department dahil hindi natin ifa-file ang isang kaso kung hindi tayo sigurado na mananalo tayo sa korte,” ani Clavano.
