Dalawang lalaki na naghahamon ng away sa bawat dumaraan habang nagsisigaw sa kalsada kamakalawa ng hatinggabi sa panulukan ng San Andres at A. Mabini Streets sa Malate, Maynila ang kapwa arestado ng mga tauhan ng Manila Police District- Police Station .
Nahaharap sa kasong Alarm and Scandal at City Ordinance 864-C (Concealing Bladed Weapon)sa Manila Prosecutors Office,ang mga suspek na si Herbert Casil,37, miyembro ng Sputnik gang at Taga 848 Oroquieta St., Sta. Cruz, Maynila ; at Ronriz Peralta ,20, miyembro ng Bahala na Gang” at residente ng No. 1333 Bambang St., Sta. Cruz, Maynila. Nakumpiska sa bulsa ng mga suspek ang dalawang balisong.
Napag-alamang nakatanggap ng reklamo ang pulisya kay Roberto Tolete y Braza, Barangay Tanod,alas 11:40 ng gabi kaugnay sa pagwawala ng mga suspek sa nabanggit na lugar.
Mabilis na rumesponde ang mga pulis para beripikahin ang sumbong at pagdating sa lugar ay nakita nila ang dalawang suspek na kapwa nagsisigaw at naghahahamon ng away sa mga nagdadaan sa lugar.
Inaresto ng mga pulis ang mga suspek na hinihinalang lulong sa iligal na droga nang mga oras na iyon. (Arsenio Tan)
