Arestado ang dalawang lalaking miyembro ng Batang City Jail (BCJ) gang sa isang buy-bust operation sa Port Area, Manila kahapon ng madaling araw.
Ang mga suspek ay nakilalang sina King Diocton, alyas ‘Bibi,’ 20, at John Rongcales, 46, kapwa residente ng Baseco Compound, sa Port Area.
Batay sa ulat ni PSSg Bob John Lolong, ng Baseco Police Station (PS-13) ng Manila Police District (MPD), dakong alas-5:00 ng madaling araw nang maaresto ang mga suspek sa Block 15A, sa Baseco Compound.
Nauna rito, nakatanggap ng tip ang mga tauhan ng Station Drug Enforcement Unit (SDEU), sa pangunguna ni PCAPT Harold Celestra, hinggil sa ilegal na aktibidad ng mga suspek, kaya’t kaagad na nagkasa ng isang buy-bust operation na nagresulta sa kanilang pagkakaaresto.
Nakumpiska mula sa mga suspek ang P500 na buy-bust money at limang piraso ng heat-sealed transparent plastic sachets na naglalaman ng hinihinalang shabu, na tinatayang tumitimbang ng may 5.3 gramo, at may estimated street value na P36,040.
Kasalukuyang nakapiit ang mga suspek na nakatakdang sampahan ng kasong paglabag sa Republic Act 9165 sa Manila City Prosecutors Office.
