NAG-RESIGN na si Undersecretary Leocadio Sebastian sa kanyang posisyon sa Department of Agriculture (DA) dahil sa “unauthorized signing” ng sugar importation order.
Ito ang inihayag ng Malacañang noong Biyernes ng gabi.
Isinumite ni Sebastian ang kanyang resignation letter na may petsang Agosto 11, 2022 at sinabing “to be relieved of my delegated authorities and the assignments and responsibilities in my capacity as Chief of Staff and Undersecretary.”
Inamin ni Sebastian na hindi nagbigay si Pangulong Ferdinand Marcos Jr. ng “authorization” para ilabas ang order, ayon kay Press Secretary Trixie Cruz-Angeles.
“Nagbigay po ng letter of resignation si Undersecretary Leocadio Sebastian, “ani Cruz-Angeles sa Facebook live.
“Inaamin niya na nag-convene siya ng Sugar Regulatory Board at pumirma siya… Inaamin niyang walang pahintulot ito ng Pangulo,” dagdag ni Cruz-Angeles.
Ipinaliwanag ni Cruz-Angeles na ang meeting para sa “unauthorized resolution” ay “illegal” dahil hindi ito iniutos ni Pangulong Marcos, na kasalukuyang chairman ng Sugar Regulatory Board.
Sa “Laging Handa” public briefing na iniere sa People’s Television Network noong Biyernes, sinabi ni Cruz-Angeles na “heads will roll” kapag napatunayan na kung sinu-sino ang sangkot sa “unauthorized signing” ng resolusyon na umano ay nag-approve ng importation ng 300,000 metric tons (MT) ng asukal.
Noong Miyerkules, inanunsyo ni Cruz-Angeles na ni-reject ni Pangulong Marcos ang proposal ng Sugar Regulatory Administration (SRA) na mag-angkat ng 300,000 MT ng asukal dahil sa mataas na presyo nito sa merkado.
Bago ang pahayag ni Cruz-Angeles, ang resolution na nag-apruba ng sugar importation ay na-post sa SRA website pero ibinura na ron kalaunan. Si Sebastian ang pumirma sa naturang resolution.
Ang kopya ng resignation ni Sebastian ay isinapubliko ng Office of the Press Secretary.
Humingi ng paumanhin si Sebastian kay Pangulong Marcos at inako ang responsibilidad sa ilegal na pag-isyu ng resolution.
“I sincerely offer my apologies, Your Excellency, for my having approved Sugar Order no. 4 on your behalf, and through the authority you had vested upon me. It has become clear that the same was not in keeping with your administration’s desired direction for the sugar industry. I take accountability and responsibility for its consequences,” ayon kay Sebastian.
Sa tanong kung sasampahan ng kaso si Sebastian, sinabi ni Cruz-Angeles: “Kapag administratibo ang kaso, ang pinakamataas na penalty ay dismissal. So, ‘pag napangunahan ng resignation, ‘yun na po ‘yun.”
“Ngayon, titignan natin ‘yung resulta ng imbestigasyon kung kinakailangan pa ng mas malalim na imbestigasyon that will require a law enforcement agency. Sa ngayon, ang nakikita natin ay (For now, what we see is) the investigation is primarily administrative in nature,” dagdag pa niya.
