NAPAGKASUNDUAN na payagan na ng pamahalaan ang naka-planong Christmas convoy ng may 40 seacraft sa West Philippine Sea (WPS) na inorganisa ng sibilyang grupo.
Kahapon ay inihayag na pinayagan na ng National Security Council (NSC) ang Christmas convoy ng ATIN ITO! Coalition na maglalayag patungo sa mga occupied territories ng Pilipinas na dadaan lamang sa general vicinity ng Ayungin Shoal .
“Both parties agreed that a convoy to the BRP Sierra Madre in Ayungin Shoal would not be advisable at this time since the safety of the civilian convoy is of paramount consideration. Nonetheless, the planned Christmas convoy will pass through the general vicinity of Ayungin Shoal as far as practicable, on its way to other selected PH-occupied features to bring Christmas cheer directly to our troops assigned to those areas as well as to our fisherfolk,” ayon sa NSC.
Ayon kay NSC Spokesperson Asst. Director Jonathan Malaya, ang nasabing Christmas convoy ay magtutungo sa nasasakupang isla kabilang ang Pagasa Island upang magdala ng mga pamasko sa mga sundalong nakatalaga doon, subalit nilinaw ng NSC na hindi papasok o lalapit mismo sa Ayungin Shoal ang mga regalo at donated supplies na planong ibigay naman sa mga sundalong nasa BRP Sierra Madre ay itu-turn over sa Philippine Navy-AFP at sa Philippine Coast Guard upang maihatid kasabay ng regular na pagsasagawa ng rotation and resupply mission sa Ayungin Shoal.
Sa pamamagitan aniya ng Christmas convoy na magtutungo sa mga teritoryo ng bansa, tiyak na mapapasaya at mas mapapalakas ang loob ng mga sundalo at iba pang frontliners na patuloy na nagtataguyod ng soberanya ng bansa.
Kasunod nito, tinitiyak ng NSC ang kaligtasan ng mga sasama at lalahok sa Christmas convoy.
Nabatid na may siyam na maritime features sa West Philippine Sea ang ino-okupa ng Pilipinas.
Ayon kay Commodore Jay Tarriela, Philippine Coast Guard spokesperson for the West Philippine Sea, “Puntahan niyo ‘yung other 8, huwag lang Ayungin Shoal kasi alam naman natin even the Philippine Coast Guard and the Armed Forces of the Philippines whenever we do the resupply talagang mararamdaman mo ‘yung aggressive behavior ng China sa conduct ng resupply.”
Una nang tinanggihan ng National Task Force for the West Philippine Sea ang plano ng ATIN ITO coalition na bisitahin ang BRP Sierra Madre.
“We can go to other maritime features but not Ayungin Shoal because as I said, the danger is so high in this area,” ani Tarriela.
Una rito, nag-organisa ang naturang grupo na kinabibilangan ng Akbayan Party ng 40 vessel convoy na maglalayag mula El Nido sa Palawan patungong Ayungin para mamahagi ng food at navigation tools sa tropa ng Pilipinas.
