NAGKAROON na ang Pilipinas at China ng pag-uusap ukol sa sea-related issues, partikular na sa usapin sa Sabina Shoal.
Kinumpirma din ng Chinese Embassy in Manila na nakipagtalakayan ang vice foreign minister ng Tsina at kanyang Philippine counterpart.
“Chinese Vice Foreign Minister Chen Xiaodong held a bilateral consultation mechanism (BCM) meeting on the South China Sea with Philippine Undersecretary of Foreign Affairs Maria Theresa Lazaro in Beijing on Wednesday,” ayon sa Chinese Foreign Ministry .
Nagkasundo umano ang dalawang bansa na ipagpatuloy ang kanilang dayalogo sa pamamagitan ng diplomatic channels.
Ang Xianbin Reef, na kilala rin bilang Sabina Shoal, ay pinagtatalunang katubigan sa South China Sea malapit sa Spratly Islands, kung saan tinawag ito ng Tsina na Nansha Islands. Tinukoy naman ng Pilipinas ang Sabina bilang Escoda Shoal.
Sa kabilang dako, hinikayat naman ng Tsina ang Pilipinas na alisin ang BRP Teresa Magbanua mula sa Escoda Shoal dahil ang presensiya nito ay malinaw na paglabag umano sa Chinese sovereignty.
“The two sides had a candid and in-depth exchange of views on maritime issues, especially the issue of Xianbin Jiao,” ayon sa inilabas na pahayag ng China Foreign Ministry.
Ang BRP Teresa Magbanua ay nakahimpil sa Escoda Shoal simula pa noong Abril sa gitna ng ulat na may mga reclamation activities ang Tsina sa lugar.
Kamakailan lamang ay naghain ang Chinese foreign ministry ng protesta sa naging presensiya ng Philippine ship BRP Teresa Magbanua sa Escoda Shoal.
Ang Escoda Shoal ay matatagpuan sa 75 nautical miles o 140 kilometers off ng Palawan at na sa loob ng 200-nautical-mile exclusive economic zone (EEZ) ng Pilipinas.
