ISANG tinaguriang bomb expert na sangkot umano sa serye ng mga pagpapasabog ang nadakip sa inilunsad na joint law enforcement operation ng military at pulis sa Barangay Salat, President Roxas, North Cotabato kamakalawa ng madaling araw.
Ayon kay Maj. Gen. Roy Galido, Commander ng Joint Task Force Central, nadakip ng kanyang mga tauhan katuwang ang local police si Jordan Akmad, a.k.a. Jordan Kamad, kilalang improvised explosive device (IED) maker, bomber, at kasapi ng Daulah Islamiyah-Hassan Group na sangkot sa extortion activities.
Si Akmad ay nadakip ng pinagsanib na puwersa ng 602nd Infantry Brigade sa pamumuno ni Col. Donald Gumiran at President Roxas Municipal Police Station; 90th at 72nd Infantry Battalions, ang 1st Scout Ranger Battalion, at military intelligence units.
Nabatid na may standing warrant of arrest sa kasong Murder at Multiple Frustrated Murders ang nadakip na terrorist / extortionist , Sinasabing sangkot ang suspek sa pambobomba sa bus terminals sa Davao City at Kabacan, Cotabato.
Kasamahan din nito si Ali Akbar, ang leader ng Al Khobar Group na nauuna ng nadakip noong June 2021 sa bisa ng inilabas na warrant of arrest.
Si Akbar ay siyang utak sa naganap na YBL bus bombing sa Tulunan, North Cotabato nuong Enero 2021 at pagsunog sa YBL bus sa M’Lang, North Cotabato nuong June nang nasabing taon na ikinamatay ng apat na katao.
Pansamantalang naka detini ngayon si Akmad sa President Roxas MPS para sa paghahain ng kaukulang kaso.
“I commend the troops of Joint Task Force Central for this remarkable accomplishment. The Western Mindanao Command, through its joint task forces, will continue to work with our partners from the PNP and other security agencies to keep the communities safe and free from violence,” pahayag ni Brig. Gen. Arturo Rojas, WestMinCom Acting Commander. (VICTOR BALDEMOR RUIZ)
