NAPATAY sa isinagawang joint law enforcement operation ng military at pulis ang isang field commander ng Bangsamoro Islamic Freedom Fighter-Karialan Faction (BIFF-KF) at isang kasamahan nito sa naganap na sagupaan sa Tacurong City, Sultan Kudarat.
Kinilala ni Joint Task Force Central Commander, Maj. Gen. Alex Rillera ang napatay na local terrorists leader na si Abdulkarem Lumbatan Hasim, a.k.a. Boy Jacket, field commander ng BIFF-KF, at kasama nitong si t, Mahmod Lumbatan, a.k.a. Mahmod Capunlo.
Sa record ng pulisya, ang napatay na terorista ay suspek sa pananambang at pagpatay kay Ampatuan, Maguindanao chief of police chief at kanyang police driver.
Ayon kay Philippine National Police (PNP) chief Gen. Rodolfo Azurin, Jr., si Abdulkarim Hasim ay nakipagpalitan ng putok sa mga awtoridad nang silbihan ito ng warrant of arrest dahil sa mga kinakaharap nitong kaso tulad ng murder at double frustrated murder.
Natukoy si Hasim na nasa likod nang pamamaslang kay Ampatuan Police Chief Lt. Reynaldo Samson at kanyang driver na si Cpl. Salipuden Endad sa Barangay Kapinpilan noong August 2022.
Sangkot din ang suspek sa serye ng harassment sa mga patrol base ng 40th Infantry Battalion, 601st Brigade sa Datu Hoffer Ampatuan.
Sa pahayag ni Brig. Gen. Pedro Balisi, Jr., Commander ng 1st Mechanized Brigade, ikinasa ng pinagsanib na puwersa ng 1st Mechanized Battalion, Joint Task Force Talakudong, Tacurong City Police Station, 1202nd Regional Mobile Force Battalion, Maguindanao Provincial Police Office at Police Regional Office BARMM ang joint law enforcement operation .
Pinuri ni Lt. Gen. Roy Galido, Commander ng Western Mindanao Command, ang AFP at PNP troops: “Your armed forces, together with other law enforcement agencies, will continue to intensify the conduct of law enforcement operations to thwart lawlessness.” (VICTOR BALDEMOR RUIZ)
