Ni MARK ALFONSO
INILUNSAD ng Malacañang ang “Bagong Pilipinas” campaign bilang bago umanong “brand” ng governance at leadership sa ilalim ng administrasyon ni Pangulong Ferdinand R. Marcos Jr., tungo sa full economic recovery.
Ayon kay Communications Secretary Cheloy Garafil, pirmado ni Excutive Secretary Lucas Bersamin ang Memorandum Circular (MC) No. 24 noong Hulyo 3, 2023 at inilabas ng Malacañang nitong Linggo, Hulyo 16 kung saan magiging bahagi ang “Bagong Pilipinas” ng branding at communications strategy ng National Government.
Sa ilalim ng tatlong pahinang memorandum, inaatasan ang lahat ng national government agencies (NGAs), government-owned or -controlled corporations (GOCCs), state universities at colleges (SUCs), na i-adopt ang “Bagong Pilipinas” campaign sa kanilang mga programa, aktibidad, at proyekto.
Inatasan din ang naturang mga ahensya na gamitin ang logo ng “Bagong Pilipinas” sa letterheads, websites, official social media accounts, at iba pang dokumento na nakatuon sa flagship programs ng gobyerno.
“Bagong Pilipinas is the overarching theme of the Administration’s brand of governance and leadership, which calls for deep and fundamental transformation in all sectors of society and government, and fosters the State’s commitment towards the attainment of comprehensive policy reforms and full economic recovery,” nakasaad sa memorandum.
“Bagong Pilipinas is characterized by a principled, accountable, and dependable government reinforced by unified institutions of society, whose common objective is to realize the goals and aspirations of every Filipino.”
Nabatid na ang hugis bilog na logo ay katulad ng watawat ng Pilipinas kung saan ang isang dilaw na araw ay nakikita na bahagyang nababalot ng asul at pulang tila laso at may tatlong bituin din sa ibabaw nito.
