MAY 21 bagong pasilidad ang ipinagkaloob sa Philippine Army mula sa mula sa Bases Conversion and Development Authority (BCDA) na pinamumunuan ngayon ni dating Defense Secretary Delfin Lorenzana .
Ayon kay Army spokesman Col. Xerxes Trinidad , pormal na tinanggap ng Army Support Command (ASCOM) na naka-base sa Camp Servillano Aquino, Tarlac City ang 21 bagong pasilidad na itinayo sa tulong ng BCDA.
Nabatid na ang Army Support Command (ASCOM) facilities project ay bahagi ng 2017 memorandum of agreement na nilagdaan ng BCDA at ng Department of National Defense para sa paglipat ng mga pasilidad ng Army mula Fort Bonifacio sa Taguig City patungo sa Camp Servillano Aquino sa Tarlac
Ayon pa kay Col. Trinidad, nilagdaan ni Bases Conversion and Development Authority chair Delfin Lorenzana at Philippine Army acting chief of staff Major General Jose Eriel Niembra, na siyang kumakatawan kay Army commander Lt. Gen. Romeo Brawner, Jr., ang dokumento para sa turnover ng mga pasilidad sa isang seremonya sa Camp Servillano Aquino.
Inihayag naman ni ni Major General Niembra na ang paglilipat at pagtatayo ng mga modernong pasilidad ng ASCOM sa isang strategic location gaya sa Camp Servillano Aquino ay higit na magpapalakas sa kakayahan ng unit na magbigay ng logistical support sa ground forces.
Dagdag pa ng heneral, ang mga pasilidad ay inaasahang makapagbibigay ng mas mahusay na logistics, safe storage at management hub para sa ASCOM na nakatalagang magbigay ng firepower, transportation, organizational, at maintenance equipment support para sa lahat ng yunit ng Hukbong Katihan. (VICTOR BALDEMOR RUIZ)
