Pitong opisyal at miyembro ng Tau Gamma Phi fraternity officers ang nakatakdang sampahan ng kaso ng Department of Justice (DOJ) kaugnay sa hazing slay ng Adamson University student na si John Matthew Salilig.
Napag-alaman sa DOJ Prosecutors na may ebidensiya laban sa mga suspek para madiin sa kasong paglabag sa Anti-Hazing Act of 2018 sa isinagawang imbestigasyon.
Kabilang sa mga kinasuhan ay sina Earl Anthony Osita Romero a.k.a. “Slaughter”; Tung Cheng Benitez Teng, Jr. alyas “Nike”; Jerome Ochoco Balot alias “Allie”; Sandro Dasalla Victorino alyas “Loki”; Michael Lambert Alcazar Ricalde alyas “Alcazar”; Mark Muñoz Pedrosa alyas “Macoy”; at Daniel Delos Reyes Perry a.k.a. “Sting’.
Sasampahan rin ang mga respondents ng kasong physical injury dahil sa pananakit sa neophyte na si Roi Osmond Dela Cruz.
Ayon sa resolusyon may petsang Marso 13 ng panel of prosecutors, lahat umano ng respondents ay aktuwal na nakilahok sa hazing.
“Based on the evidence presented during the inquest proceedings, the panel gathered that the above-named respondents, together with other individuals who remain at large, recruited John Matthew Salilig, Roi Osmond Dela Cruz and two (2) others to join the Tau Gamma Phi Fraternity- Adamson University Chapter,” ayon sa DOJ
Nabatid na si Salilig ay ni- recruit at isinailalim sa hazing noong Pebrero 18 sa Biñan,Laguna at ayon sa testigo,tumanggap ito ng 70 Palo ng paddle.
Ang kaso sa mga respondents ay isasampa sa Biñan, Laguna RTC. (Arsenio Tan)
