GINAWARAN ng pagkilala ni Armed Forces of the Philippines (AFP) Chief of Staff General Romeo Brawner, Jr. ang 12 sundalo ng Philippine Army sa kanilang kahandaang magbuwis ng buhay laban sa mga rebeldeng Communist New People’s Army (NPA) sa Surigao del Norte.
Pinagkalooban ng parangal ni Brawner ang mga sundalo nang bisitahin niya ang mga ito nitong nakalipas na linggo sa headquarters ng 901st Infantry Brigade sa Sta. Cruz, Placer, Surigao del Norte.
Dito ay iginawad ng heneral ang Gold Cross Medal, Silver Cross Medal at Military Merit Medal sa dalawang opisyal at sampung enlisted personnel ng Philippine Army, bunsod ng matagumpay na operasyon ng government troops sa Placer na nagresulta sa pagkakapatay ng limang miyembro ng NPA, kabilang ang isang ‘most wanted’ na NPA lider sa Caraga Region.
“Our focused military operations, supported by good governance and the cooperation of our people, have significantly weakened the NPA… the AFP is now gradually shifting focus to territorial defense,” ani Brawner.
Kabilang sa mga dumalo sa seremonya sina Major General Michele Anayron, Jr., commander ng 4th Infantry Division at Brigadier General Arsenio Sadural ng 901st Infantry Brigade.
