“START your day with a prayer.”
Ito ang panawagan ni Manila Mayor Honey Lacuna sa lahat ng opisyal at kawani ng pamahalaang-lungsod ng Maynila bilang pakikiisa ng lungsod sa paggunita ng “National Bible’s Month.”
Pinuri din ng alkalde si City Administrator Bernie Ang, na siyang host ng flagraising ceremony nitong Lunes, na ayon sa kanya ay ‘lagpas-lagpas’ pa sa tawag ng kanyang tungkulin ang ginagawang pagtulong sa mga kawani ng lungsod at nagsisilbi bilang pangunahing tanggapan sa pagpapatupad ng mga hakbangin sa pagtahak ng lungsod ng daan patungong “Magnificent Manila” sa 2030.
Ang tanggapan ni Ang, ayon sa kanyang deputy na si Joy Dawis, ay nagsisilbi blang head office ng mga departmento, tanggapan at ahensya gayundin bilang executive director, chairman, co-chairman at vice chairman ng iba’t-ibang executive commitees executive council, task forces at technical working groups, maliban pa sa pagiging liaison at mediator para sa ilang tanggapan upang matiyak na sila ay nakalinya rin sa adhikain ng tanggapan ng alkalde para sa pagbibigay ng mas magandang serbisyo sa lungsod.
Sa kanyang maiksing mensahe, sinabi ni Lacuna na sinisimulan niya ang kanyang araw sa pamamagitan ng simpleng panalangin “na sana, ang buong arraw ay magdaan nang maayos, payapa at kapaki-pakinabang sa bawat isa at sa mga mahal sa buhay.”
“Sana po ay lagi nating simulan ang ating araw ng isang dasal na magpapalakas hindi lamang po sa ating espiritwal na pamumuhay kundi sa atin pong pangaraw-araw na pakikisalamuha sa bawat isa na ating mga kababayan at sa pamamagitan nito ay magawa natin ang ating mga tungkulin nang may saya at kaluwagan para sa ikapapakinabang ng ating mga pinaglilingkuran,” ani Lacuna.
Binigyang-diin pa ng alkalde na, “Lagi nating isipin na maliban sa ating mga mahal sa buhay ay may mga kababayan tayong umaasa ng pagkalinga mula sa kanilang pamahalaan.”
Ang flagraising ceremony ay nagtapos sa pamamagitan ng distribusyon ng Bibliya sa mga dumalo na isinagawa ng mga miyembro ng Philippine Bible Society.
